2021 වසරේ සිට සංස්කාරක මණ්ඩලයේ සැලසුම වූයේ පඨිත: සමාජ සංස්කෘතික සමීක්ෂා එක් වෙළුමක් හා සම්බන්ධිත කලාප දෙකක් වශයෙන් වසරකට දෙවරක් ප්රකාශයට පත්කිරීමටය. ඒ තීරණයට පැමිණීමේ පදනම වූයේ, වසර හතක නිහැඩියාවකට පසු 2020 දී පඨිත නැවත වරක් පළකිරීම ඇරඹීමත් සමගම ඊට ලැබුන බුද්ධිමය ප්රතිචාරය හා උනන්දුවය. එනමුත් 2020 දී මතුවූ කොරෝනා රෝගී තත්ත්වය බරපතල මහජන සෞඛ්යය අර්බුදයක් බවට පත් වූ පසු සහ දැනට මෙරට මුහුණදෙමින් තිබෙන ආර්ථික සහ දේශපාලනික අර්බුද හමුවේ මේ කටයුත්ත මෙලෙසින්ම කිරීම අපහසු වී ඇත.
2021 වෙළුමේ පළමු කලාපය නිසි කාලයට සුදානම්ව තිබුන ද පැවති කොරෝනා තත්ත්වය තුළ සමාජයේ පුළුල් වශයෙන් සිදුවූ විපර්යාස, ගැටළු හා ක්රියාත්මක කර සංචරණ සීමා හමුවේ දෙවන කලාපයට ලිපි ලැබීමේ ප්රවණතාව බෙහෙවින් මන්දගාමී විය. එමන්ම, කොරෝනා තත්ත්ව යටතේ, සුදානම්ව තිබූ කලාපයේ මුද්රණ කටයුතු ද කල්දමන්නට සිදු විය. මීට අමතරව, ශ්රී ලංකාවේ දැනට පවතින සමාජ-දේශපාලනික හා ආර්ථික අර්බුද යන පුළුල් සන්ධර්භය තුළ 2022 වෙළුමේ කලාප දෙකටම ඉහත කී තත්ත්වය එලෙසින්ම බලපා ඇත. එමෙන්ම, වර්තමාන තත්ත්වය තුළ මෙරට ප්රකාශන කර්මාන්තය මුළුමනින්ම පාහේ බිඳවැටී ඇති හෙයින් එම කලාප මුද්රණය කිරීම කොහෙත්ම කළ හැකි දෙයක් නොවේ.
මේ තත්ත්ව තුළ පඨිත සාර සංග්රහයක් වශයෙන් සම්පාදනය කිරීම අත්හිටුවීම වෙනුවට සංස්කාරක මණ්ඩලය තීරණය කර ඇත්තේ, ලැබෙන ලිපි අනුව සැම වෙළුමක් ම සලසුම් කළ පරිදි කලාප දෙකක් ලෙස එකාබද්ධව සම්පාදනය කිරීම සහ මුද්රණය කිරීම අත්හිටුවා, මේ අර්බුදකාරී තත්ත්වය පාලනය වෙන තුරු පඨිත වෙබ් අඩවිය ඔස්සේ පලකරන සැම කලාපයක්ම ලබාගැනීමට අවකාශ සැලැස්වීමය. මේ අනුව, 2021 වසරේ 12 වන කලාපය (පළමු හා දෙවන ඒකාබද්ධ වෙළුම්) මෙතැනින් ලබා ගත හැක.
මේ සමස්ථ ගැටළුව නිමිත්තක් වශයෙන් ගෙන, මේ අර්බුද කාලය තුළ බුද්ධිමය කටයුතුවල නිරතවීම පිළිබඳ මූලික කතාබහක් 2022 ජූනි 15 වනදා සවස 05.00 ට ‘අර්බුද සමයක ඥාන සම්පාදනය’ යන මැයෙන් අන්තර්ජාලය ඔස්සේ පැවැත්වීමට කටයුතු කර ඇත. ඊට සහභාගි වීමට කැමති නම්, මේ සබැඳියාව ඔස්සේ සහභාගී විය හැක.
ඒ පිළිබඳ අමතර තොරතුරු පහත සදහන් වේ.
